Kosova dhe Gjermania kanë marrëdhënie speciale

Në pallatin presidencial Bellevue në Berlin, Ambasadori i ri i Republikës së Kosovës në Gjermani, dr. Faruk Ajeti, ia ka dorëzuar letrat kredenciale Presidentit të Republikës Federale të Gjermanisë, dr. Frank-Walter Steinmeier, duke u akredituar kështu si Ambasador i Jashtëzakonshëm dhe Fuqiplotë i Republikës së Kosovës në Gjermani.

Ambasadori Ajeti gjatë ceremonisë akredituese u prit me nderime të larta shtetërore nga presidenti gjerman Steinmeier.

Gjatë ceremonisë së akreditimit dhe audiencës Presidenti Steinmeier i ka uruar mirëseardhje Ambasadorit Ajeti me rastin e fillimit të misionit diplomatik në Berlin, duke shprehur konsideratën e tij të lartë për marrëdhëniet shumë të mira ndërmjet dy vendeve dhe duke vënë në pah mbështetjen e vazhdueshme të Gjermanisë për Kosovën dhe përkushtimin e saj ndaj perspektivës euro-atlantike.

Në një bisedë të përzemërt Presidenti Steinmeier dhe Ambasadori Ajeti diskutuan mundësitë e thellimit dhe avancimit të marrëdhënieve bilaterale ndërmjet Kosovës dhe Gjermanisë, duke theksuar nevojën e thellimit të bashkëpunimit ndërshtetëror, ekonomik dhe kulturor.

Gjatë fjalës së tij, Ambasadori Ajeti i përcolli Presidentit Steinmeier përshëndetjet e përzemërta të Presidentes së Republikës së Kosovës, dr. Vjosa Osmani-Sadriu, duke ritheksuar raportet e shkëlqyeshme ndërmjet dy shteteve. “Kosova dhe Gjermania kanë marrëdhënie speciale dhe do të kenë miqësi të përhershme. Gjermania mbetet për Republikën e Kosovës një partnere strategjike dhe aleat i dëshmuar historik i vendit dhe qytetarëve të saj”, ka theksuar Ambasadori Ajeti.

Në ceremoninë zyrtare në Pallatin Bellevue, Ambasadori Ajeti ishte i shoqëruar nga bashkëshortja.

Ambasadori Ajeti është ambasadori i katërt i Republikës së Kosovës në Republikën Federale të Gjermanisë.

Comments are closed.

%d bloggers like this:

By continuing to use the site, you agree to the use of cookies. more information

The cookie settings on this website are set to "allow cookies" to give you the best browsing experience possible. If you continue to use this website without changing your cookie settings or you click "Accept" below then you are consenting to this.

Close