Në Krujë, fluks turistësh të huaj në prag të sezonit turistik
ATSH/ Fluksi i turistëve të huaj në vendin tonë, ka nisur herët këtë vit, përpara çeljes së sezonit turistik veror.Në Krujë, Muzeu Kombëtar “Gjergj Kastrioti Skënderbeu” dhe Muzeu Etnografik zgjojnë interes të veçantë të turistëve vendas e të huaj, të cilët mbeten të mahnitur nga historia dhe tradita shqiptare.
Kruja është kthyer tashmë në një qytet me turizëm gjithëvjetor, i favorizuar nga vlerat që mbart, por edhe nga vendndodhja gjeografike dhe peizazhi i bukur malor që ofron natyra me bimësi të larmishme.
Sipas të dhënave zyrtare, në tre muajt e parë të këtij viti, dy muzetë në Krujë u vizituan nga 5 mijë vizitorë nga 3400 që u shënua në 2021-shin.
Qyteti i Krujës është një nga destinacionet kryesore të turistëve në Shqipëri. Zona turistike Pazari i Krujës është cilësuar monument kulture i kategorisë së parë nga Instituti i Monumenteve të Kulturës dhe është një nga destinacionet turistike më të vizituara në vend në çdo stinë të vitit.
Krahas Pazarit, qyteti i Krujës ofron edhe vende të tjera interesante për t’u vizituar nga turistët, ku ndër të tjera mund të përmendet kalaja, apo edhe bujtinat e ndryshme agroturistike që ofrojnë ushqime tradicionale mjaft tërheqëse në ambiente me peizazhe piktoreske.
Comments are closed.